Orla Kiely SS14 by Carrie WishWishWish on Flickr.
فى مراحل كتير من عمرى كنت مصدقة انى مميزة ، كنت بقرأ كتب فى محيط ماكانش حد بيقؤا فيه غيرى ، كنت بلعب موسيقى فى مدرسة او مدارس كتير مفيهاش حد يعرف يعنى ايه نوتة غيرى ، كنت شاطرة دراسيا رغم انى ماكنتش بطلع من الاوائل لكن كنت ذكية ، دايما تخيلت انى اما اكبر هكون اكيد عندى هدف كبير وفى الغالب فنى ، عمرى ما هستنى وظيفة اكيد هكون فى طريقى لشئ مختلف عن كدة ، فى فترة من حياتى ميلت للكتابة لحد ما لقيت ان السوشيال ميديا يمكن هيئت لناس كتير انهم يعتقدوا انهم بيحبوا الكتابة لكن الاكيد انهم مش كتاب ، يمكن دة متأخر جدا انى اكتشفه بس الحياة فاجئتنى بقد ايه الواحد صغير فيها ، قد ايه ممكن تكون كويس لكن مميز دة شئ صعب ، انا ماعنديش الشجاعة ادخل اى منافسة حتى مع نفسى ، الاكيد ان العيب مش فى الحياة ، انا اكتشفت متأخر جدا ضرورة انك تكون مجتهد مش فهلوى ، عندى حالة من التوهان ناحية كل الطرق فى حياتى ، كل حاجة بتحسسنى بالاحباط والقهر لانى مش حاسمة لحد دلوقتى انا مقهورة ولا ثورجية ولا دة مجرد تمرد بدون صوت او تعبير ، التخرج حطنى فى مواجهة مباشرة مع سؤال انا مين وعايزة ايه؟ والاجابة الوحيدة اللى عندى هى انى محبطة جدا.
